Zohran Mamdani: Waa kuma Muslimkii ugu horreeyay kuna dhashay Afrika ee loo doortay duqa magaalada New York?
Xigashada Sawirka, Reuters
Qoraalka sawirka, Zohran Mamdani wuxuu noqon doonaan Muslimkii ugu horreeyay kana soo jeeda Koofur Aasiya ee ku guuleysta duqa magaalada Article Information
-
- Author, Nada Tawfik iyo Rachel Hagan
- Role, BBC News
-
Saacad ka hor
Zohran Mamdani waxa uu sameeyay taariikh kadib markii uu noqday duqii ugu horreeyay ee Muslim ah ee magaalada New York, sidoo kale waxa uu noqday duqii ugu da’da yaraa muddo qarni ka badan.
Tartanka sanadkan ayaa soo jiitay dareenka xitaa in ka badan sidii caadiga ahayd. Xildhibaanka 34-jirka ah ayaa sanadkan kasoo billaabay inuu noqdo musharrax aan la aqoon balse waxa uu noqday ninka ugu cadcad doorashada. Doorashadiisu waxay calaamad u tahay horumar, taas oo muujinaysa isbeddel ku yimid siyaasadda magaalada.
Madaxweynaha Mareykanka Donald Trump ayaa ku boorriyay cod bixiyayaasha inaysan dooran Mamdani isagoo taageeray mid ka mid ah dadka sida weyn u dhaleeceyn jiray muddada dheer, waa guddoomiyihii hore Andrew Cuomo, kaasoo u tartamay si madax bannaan kadib markii uu ku guuldarreystay isreebreebka Dimuqraaddiga.
“Haddii aad shakhsi ahaan jeceshahay Andrew Cuomo iyo haddii kale, dhab ahaantii ma lihid doorasho. Waa inaad isaga doorataa, oo aad rajaysaa inuu qabto shaqo cajiib ah,” Trump ayaa soo dhigay bartiisa Truth Social fiidnimadii Isniinta. “Waa uu u leeyahay awood, Mamdani maaha!”
Cuomo, oo mar ahaan jiray nin si weyn uga dhex muuqda siyaasadda gobolka, ayaa ka jawaabay taageerada degdegga ah: “Ima soo sharraxayo aniga, ee wuxuu ka soo horjeedaa Mamdani.”
Trump ayaa sidoo kale diiday in uu taageero musharraxa xisbiga Jamhuuriga, Curtis Sliwa, oo kaalinta saddexaad ka galay booskiisa, isaga oo yiri “Cod la siiyo Curtis Sliwa… waa u codeynta Mamdani”.
Laga soo bilaabo Uganda ilaa Queens
Wuxuu ku dhashay Kampala, Uganda, Mamdani wuxuu u guuray New York isaga iyo qoyskiisa isaga oo 7 jir ah. Waxa uu dhiganayay Dugsiga Sare ee Sayniska ee Bronx ka dibna waxa uu shahaado cilmiga Afrikaanka ka qaatay Kulliyadda Bowdoin, halkaas oo uu ka aasaasay cutubka kambaska ee Ardayda Caddaaladda ee Falastiin.
Waxa uu ku soo noolaa magaalooyin kala duwan. Waxa uu soo bandhigay hal muuqaal olole oo gabi ahaanba afka Urdu ah oo uu ku dhex daray muuqaallada filimada Bollywoodka. Mid kale, wuxuu ku hadlaa afka Isbaanishka.
Mamdani iyo xaaskiisa, gabadha 27-jirka reer Brooklyn ee farshaxanka Suuriya degganna Rama Duwaji, ayaa ku kulmay app-ka shukaansiga ee Hinge.
Hooyadii, Mira Nair, waa agaasime filimeed caan ah, aabbihiis Bare Sare Mahmood Mamdani, ayaa wax ka dhiga Columbia. Labada waalidba waxay kasoo baxeen Jaamacadda Harvard.
Xigashada Sawirka, Reuters
Qoraalka sawirka, Zohran Mamdani iyo waaliddiintiisa Mahmood Mamdani (M) iyo Mira Nair (B) iyo xaaskiisa Rama Duwaji (dhexda)
Mamdani waxa uu isu arkaa in uu yahay musharraxa shacabka iyo abaabule.
Kahor inta uusan siyaasadda gelin, waxa uu ahaa lataliye guri, isaga oo ka caawinaya ymilkiilayaasha guryaha ee dakhligoodu yar yahay ee Queens in ay ka dagaallamaan guri ka saaridda.
Waxa kale oo uu diintiisa Islaamka ka dhigay qayb muuqata oo ololihiisa ka mid ah. Wuxuu si joogto ah u booqan jiray masaajidda wuxuuna sii daayay muuqaal olole ah oo ku baxayay afka Urdu oo ku saabsan dhibaatada nololeed ee magaalada.
“Waan ognahay in qofka Muslimka ah ee xil isku soo sharxa ay tahay inaan nafteenna u hurno,” ayuu ka sheegay isu soo bax.
“Ma jiro cid matalaysa wadarta arrimaha aan runtii daneeyo ee hadda u tartamaya duqa magaalada marka laga reebo Zohran,” Jagpreet Singh, oo ah agaasimaha siyaasadda ee ururka caddaaladda bulshada ee DRUM, ayaa sidaa u sheegay BBC.
Hardanka Mamdani ee helitaanka adeegyada jaban
Mamdani waxa uu sheegay in cod-bixiyayaasha magaalada ugu qaalisan Maraykanka ay doonayaan in Dimuqraadiyiintu ay diiradda saaraan awooddooda.
“Tani waa magaalo afartii qof ee ku nool mid ka mid ah uu ku nool yahay faqri, waa magaalo ay 500,000 oo carruur ah habeen walba gaajo u seexdaan,” ayuu u sheegay BBC-da munaasabad dhawaan dhacday. “Ugu dambeyntiina, waa magaalo halis ugu jirta inay lumiso taas oo ka dhigaysa mid gaar ah.”
- Adeegga baska oo bilaash ah magaalada dhan
- Kiro rakhiis ah iyo tallaabo laga qaado mulkiilayaasha dayacaadda sameeya
- Dukaamo khudradda iyo raashiinka lagu gado oo rakhiis ah
- Daryeelka carruurta oo loo sameeyo kuwa u dhaxeeya lix toddobaad ilaa shan sano
- In la saddex jibbaaro wax soo saarka dhanka guryaha jaban
Cambaareyn ku aaddan khibraddiisa
Cuomo iyo qaar kale waxay ku tilmaamaan khibradda Mamdani mid aan la tijaabin oo aad u xagjirsan isagoo u tartamaya magaalo leh miisaaniyad $115 bilyan ah iyo in ka badan 300,000 oo shaqaale degmo ah.
Cuomo, oo ay taageerayaan deeq-bixiyeyaasha waaweyn oo uu ku jiro Bill Clinton, ayaa ku adkaystay inuu leeyahay khibrad, isagoo leh: “Khibrad, karti, garashada sida shaqada loo qabto, garashada sida loola macaamilo Trump, og sida loola macaamilo Washington, og sida loola macaamilo sharci-dejinta gobolka, kuwani waa aasaaska. Waxaan aaminsanahay tababarka shaqada ee York, laakiin maaha sidii duqa magaalada New York.”
Xigashada Sawirka, Shutterstock
Qoraalka sawirka, Sagaal musharrax ayaa dimuqraaddiga ka socday
Israa’iil iyo Falastiin
Mamdani wuxuu hore si adag ugu dhaleeceeyay Israa’iil, isagoo taageeray Falastiiniyiinta kuna eedeeyay Israa’iil inay geysaneyso xasuuq iyo inay tahay dawlad ku dhisan cunsuriyad. Wuxuu soo jeediyay in laga joojiyo canshuur dhaafka hay’adaha taageera deegaannada sharci-darrada ah ee Israa’iil.
Waxaa sidoo kale uu sheegay inuusan taageersanayn dal kasta oo muwaadiniintiisa lagu kala sarreeyo diin darteed, inkastoo uu aqoonsan yahay jiritaanka Israa’iil dowlad ah.
Dhanka kale, Cuomo wuxuu ku tilmaamay naftiisa “taageere buuxa oo Israa’iil ah.”
Mamdani wuxuu sheegay in uu la kulmay hanjabaado la xidhiidha islaamnimadiisa ah maalin kasta, iyadoo boolisku sheegeen in baadhitaan lagu wado dambiyada naceybka ah ee socda. Wuxuu sidoo kale ballan qaaday in haddii la doorto uu kordhin doono dhaqaalaha lagula dagaallamayo dambiyada naceybka.
